බාල වයස්කාර දැරියක දූෂණය කිරීම සහ අපයෝජනයට ලක් කිරීමේ සිද්ධියකට අදාළව සැකපිට අත්අඩංගුවට ගත් අටමස්ථානාධිපති පල්ලේගම හේමරතන හිමියන් එළඹෙන 12 වනදා දක්වා රිමාන්ඩ් බන්ධනාගාරගත කිරීමට කොළඹ අතිරේක මහේස්ත්රාත්වරයා නියෝග කර තිබේ.
කොළඹ පෞද්ගලික රෝහලක ප්රතිකාර ලබමින් සිටියදී අත්අඩංගුවට ගත් සැකකාර හිමිනම, මහේස්ත්රාත්වරයා විසින් එම රෝහල් පරිශ්රයේදීම නිරීක්ෂණය කරනු ලැබීය.
රිමාන්ඩ් නියෝගයෙන් පසු උන්වහන්සේව තවදුරටත් පෞද්ගලික රෝහලේ රඳවා තැබිය නොහැකි බව දැනුම් දුන් අධිකරණය, අවශ්යතාව පරිදි බන්ධනාගාර රෝහල වෙත හෝ කොළඹ ජාතික රෝහල වෙත මාරු කර ප්රතිකාර ලබාදෙන ලෙස නියෝග කළේය.
ලබන 12 වනදා උන්වහන්සේ අනුරාධපුර බන්ධනාගාරය වෙත ඉදිරිපත් කිරීමට නියමිතය
නිට්ටඹුව ප්රදේශයේදී පොලිස් භාරයට ගත් 15 හැවිරිදි වින්දිත දැරිය පරීක්ෂා කළ අධිකරණ වෛද්ය නිලධාරියා ඇය අවස්ථා කිහිපයකදීම අපයෝජනයට ලක්ව ඇති බව තහවුරු කර ඇත.
තමන්ව මුලින්ම අපයෝජනය කළේ අනුරාධපුරයේ විහාරාධිපති හිමිනමක බවත්, අනතුරුව පෙම්වතා සහ ඥාති සහෝදරයෙකු අතින් ද අතවරයට පත්වූ බවත් දැරිය පවසා තිබේ.
දැරිය මුලින්ම අපයෝජනය වූ අවස්ථාවේ රුධිරය තැවරුණු ඇඳුම් ඇගේ නිවස අසල වළ දමා තිබියදී පොලිසිය සොයාගෙන ඇති අතර, ඒවා රජයේ රස පරීක්ෂක වෙත යොමු කර ඇත.
මූලික පරීක්ෂණවලට අනුව, දැරියගේ මව්පියන් අදාළ හිමිනමගෙන් මුදල් ලබාගෙන සිය දියණිය උන්වහන්සේ වෙත ලබා දී ඇති බවට කනගාටුදායක තොරතුරු අනාවරණය වී තිබේ.
පොලිස්පතිවරයාගේ උපදෙස් මත විමර්ශන කටයුතු ගම්පහ කොට්ඨාස ළමා හා කාන්තා කාර්යංශය වෙත පවරා ඇති අතර, සහකාර පොලිස් අධිකාරීවරයෙකුගේ ප්රධානත්වයෙන් යුත් විශේෂ කණ්ඩායමක් මීට පෙර සැකකාර හිමියන්ගෙන් දීර්ඝ ලෙස ප්රකාශ සටහන් කරගෙන තිබුණි.
