පාඩම් කිරීම පසෙකලා ජංගම දුරකථනයෙන් 'ටික්ටොක්' (TikTok) වීඩියෝ නරඹමින් සිටි බවට කෝපයට පත් වූ පියෙකු විසින් සිය 13 හැවිරිදි බාලවයස්කාර පුත්රයාගේ තට්ටම් ප්රදේශය ගිනි රස්නය සහිත යකඩ කූරකින් පුළුස්සා තුවාල කිරීමේ කනගාටුදායක පුවතක් දෙණියාය ප්රදේශයෙන් වාර්තා වේ. මෙම අමානුෂික ක්රියාව සම්බන්ධයෙන් සැකකාර පියා දෙණියාය පොලීසිය විසින් මේ වන විට අත්අඩංගුවට ගෙන ඇත.
කුලී වැඩ සඳහා ගොස් සිටි පියාට සිය ජංගම දුරකථනය නිවසේ අමතක වී ගොස් ඇති අතර, එම අවස්ථාවේදී දරුවන් එයින් වීඩියෝ නරඹා ඇත. පසුව නිවසට පැමිණි පියා දරුවන්ට පාඩම් කරන ලෙස උපදෙස් දී ආහාර පිළියෙල කරමින් සිටියදී, ඔවුන් යළිත් වරක් දුරකථනය භාවිත කරන අයුරු දැකීමෙන් උරණ වී ලිපේ රත් වෙමින් තිබූ යකඩ කූරක් ගෙන මෙම පිළිස්සීම සිදු කර තිබේ.
පිළිස්සුම් තුවාල සහිතව පසුදා පාසල් ගිය මෙම සිසුවා පිළිබඳව නිරීක්ෂණය කළ විදුහල්පතිවරයා වහාම ක්රියාත්මක වී ඇත. සිසුවාගෙන් සිද්ධිය පිළිබඳව කරුණු විමසා දැනගත් විදුහල්පතිවරයා, කඩිනමින් ඔහුව දෙණියාය මූලික රෝහල වෙත ඇතුළත් කිරීමට පියවර ගෙන තිබේ. අනතුරුව, දරුවාගේ තත්ත්වය සැලකිල්ලට ගනිමින් ඔහුට වැඩිදුර වෛද්ය ප්රතිකාර ලබා දීම සඳහා මාතර දිස්ත්රික් මහ රෝහල වෙත මාරු කර යැවීමට රෝහල් බලධාරීන් කටයුතු කර ඇත.
කෙසේ වෙතත්, මෙම සිද්ධියට අදාළව වැඩිදුර විමර්ශන සිදු කිරීම සඳහා අදාළ නිවසට ගිය දෙණියාය පොලිස් ස්ථානාධිපති, ප්රධාන පොලිස් පරීක්ෂක චන්දන අමරත්න මහතාට දක්නට ලැබී ඇත්තේ අතිශය සංවේදී දසුනකි. එම පවුල නිවසේ ආහාරයට ගැනීමට පවා කිසිවක් නොමැති තරම් අන්ත අසරණ තත්ත්වයක ජීවත් වන බවත්, බිරිඳ සහ දරුවන් අසනීප තත්ත්වයෙන් පසුවන බවත් එහිදී අනාවරණය වී ඇත. නීතිය ක්රියාත්මක කිරීමට අමතරව සිය මනුෂ්යත්වයද පෙරදැරි කරගත් ස්ථානාධිපතිවරයා ඇතුළු පොලිස් නිලධාරීන්, තමන් සතුව තිබූ මුදල් එකතු කර එම අසරණ පවුලට අවශ්ය ආහාර ද්රව්ය මිලදී ගෙනවිත් දීමට කටයුතු කිරීම සමාජයේ කාගේත් පැසසුමට ලක්විය යුතු සුවිශේෂී සිදුවීමකි.
