සැලසුම් කර ඇති ජල කප්පාදුව මධ්යයේ, රට පුරා ඉහළ යන උෂ්ණත්වය හේතුවෙන් විජලනය සහ තාපය ආශ්රිත රෝග වළක්වා ගැනීම සඳහා තම දරුවන් දිනකට අවම වශයෙන් දෙවරක්වත් ස්නානය කරවන ලෙස වෛද්ය විශේෂඥයෝ මාපියන්ගෙන් ඉල්ලා සිටිති.
ජනමාධ්ය අමතමින් ළමා රෝග විශේෂඥ වෛද්ය දීපාල් පෙරේරා පැවසුවේ, පවතින උණුසුම් කාලගුණික තත්ත්වයන් හේතුවෙන් දරුවන් අතර සමේ රෝගවල සැලකිය යුතු වැඩිවීමක් දක්නට ලැබෙන බවයි.
තාපය හේතුවෙන් මාපියන් සුපරීක්ෂාකාරීව සිටිය යුතු අතර, තම දරුවන්ගේ සෞඛ්යය ආරක්ෂා කිරීම සඳහා සරල නමුත් ඵලදායී පියවර ගත යුතු බව වෛද්ය දීපාල් පෙරේරා අවධාරණය කරයි.
අධික තාපයේ බලපෑම අවම කිරීම සඳහා දිනකට දෙවරක් ස්නානය කිරීමට, හොඳින් සජලනය වීමට, සැහැල්ලු ඇඳුම් ඇඳීමට සහ ස්වාභාවික පාන වර්ග පරිභෝජනය කිරීමට දරුවන් දිරිමත් කරන ලෙස ඔහු මාපියන්ට උපදෙස් දුන්නේය.
මේ අතර, තම දරුවන්ට වැඩිපුර ජලය ලබාදෙන ලෙස ද වෛද්ය දීපාල් පෙරේරා ඔවුන්ගෙන් ඉල්ලා සිටියේය.
“ප්රමාණවත් තරල සහ ඛනිජ ලවණ ලබාගැනීමට අපොහොසත් වීම තෙහෙට්ටුව, හිසරදය, නිදිමත, වමනය, ශරීර වේදනාව, නින්ද නොයාම, නිදිමත වැඩිවීම සහ ආහාර රුචිය නැතිවීම වැනි බරපතල සෞඛ්ය සංකූලතා ඇති කළ හැකියි” ඔහු පවසයි.
“පානීය ජලය නොමැතිව දරුවන් පාරේ සෙල්ලම් කළහොත්, ඔවුන් විජලනය හා තාප කම්පන තත්ත්වයන්ට ගොදුරු විය හැකියි,” ඔහු සඳහන් කරයි.
එබැවින්, දෙමාපියන් තම දරුවන්ට පාසල් යවන විට වතුර බෝතල් දෙකක් ලබාදෙන ලෙස වෛද්ය දීපාල් පෙරේරා ඉල්ලා සිටියි.
