මැදපෙරදිග පවතින උණුසුම්කාරී වාතාවරණය මධ්‍යයේ සාම සාකච්ඡා සඳහා ඇති හැකියාව සොයා බැලීමේ අරමුණින් ඉරාන ඉහළ පෙළේ නිලධාරීන් දෙදෙනෙකු ඝාතනය කිරීමේ ඉලක්ක ලැයිස්තුවෙන් තාවකාලිකව ඉවත් කිරීමට ඇමරිකාව සහ ඊශ්‍රායලය පියවර ගෙන ඇත.
වෝල් ස්ට්‍රීට් ජර්නල් පුවත්පත ඇමරිකානු නිලධාරීන් උපුටා දක්වමින් වාර්තා කරන්නේ ඉරාන කථානායක මොහොමඩ් බගර් ගලිබාෆ් සහ විදේශ අමාත්‍ය අබ්බාස් අරග්චි මෙලෙස දින හතරක් හෝ පහක් වැනි කෙටි කාලසීමාවකට ඉලක්ක ලැයිස්තුවෙන් ඉවත් කර ඇති බවයි.
ඇමරිකානු ජනාධිපති ඩොනල්ඩ් ට්‍රම්ප් විසින් සාකච්ඡා සඳහා දොරටු විවෘත කිරීමත් සමඟ මෙම තීරණය ගෙන ඇති බව වාර්තා වේ. කලාපීය ස්ථාවරත්වය උදෙසා රාජ්‍යතාන්ත්‍රික මට්ටමින් විසඳුම් සෙවීමට මෙලෙස අවස්ථාව ලබා දී ඇති බව විචාරකයෝ පවසති.
කෙසේ වෙතත් ඇමරිකාව විසින් ඉදිරිපත් කරන ලද සටන් විරාම යෝජනාව ඉරානය විසින් මේ වන විට ප්‍රතික්ෂේප කර ඇත. එම යෝජනාවලිය "අධික" ඉල්ලීම් සහිත එකක් බව පවසන ඉරානය අවධාරණය කර ඇත්තේ තමන් යුද්ධය අවසන් කරන්නේ තමන්ට හිතකර කොන්දේසි සපුරා ඇති අවස්ථාවක පමණක් බවයි. මෙම තත්වය හමුවේ ඉදිරි දින කිහිපය මැදපෙරදිග දේශපාලන ගමන්මග තීරණය කරන තීරණාත්මක කාලසීමාවක් වනු ඇත.
