මේ මොහොතේ පාර්ලිමේන්තුවේදී 2026 වසර සඳහා වන අයවැය යෝජනාවලිය ඉදිරිපත් කරමින් සිටින ජනාධිපති අනුර කුමාර දිසානායක මහතා, මෙරට බදු ව්‍යුහයේ සිදු කිරීමට අපේක්ෂිත දැවැන්ත උපායමාර්ගික වෙනසක් පිළිබඳව සභාවට දැනුම් දුන්නේය. එමගින්, සාමාන්‍ය ජනතාව මත පැටවී ඇති බදු බර ක්‍රමානුකූලව අඩු කිරීම රජයේ අරමුණ බව ඔහු අවධාරණය කළේය.
ජනාධිපතිවරයා පෙන්වා දුන්නේ, වර්තමානයේදී මෙරට බදු ආදායමෙන් ඍජු බදු (Direct Taxes) සහ වක්‍ර බදු (Indirect Taxes) අතර පවතින අනුපාතය 25% ට 75% (25:75) වැනි අතිශය අසාධාරණ මට්ටමක පවතින බවයි. මෙහි අරුත වන්නේ, රජයේ බදු ආදායමෙන් හතරෙන් තුනක්ම භාණ්ඩ හා සේවා මිලදී ගැනීමේදී සියලු ජනතාවගෙන් එක හා සමානව අය කරගන්නා වක්‍ර බදු වීමයි.
මෙම තත්ත්වය වෙනස් කිරීම සඳහා සිය රජය කැපවී සිටින බව අවධාරණය කළ ජනාධිපතිවරයා, ඉදිරි වසර කිහිපය තුළදී මෙම 25:75 අනුපාතය, 40:60 අනුපාතයක් දක්වා, එනම් ඍජු බදු ආදායම 40% ක් සහ වක්‍ර බදු ආදායම 60% ක් වන මට්ටමට ගෙන ඒම සඳහා පැහැදිලි උපායමාර්ගික වැඩපිළිවෙළක් ක්‍රියාත්මක කරන බවට දැඩි විශ්වාසයකින් යුතුව ප්‍රකාශ කළේය.
