මීගමුව බන්ධනාගාරය තුළ පසුගියදා (ජූලි 05 සහ 06) ඇති වූ දරුණු ගැටුම්කාරී තත්ත්වය හේතුවෙන් මියගිය පිරිස අතර 73 හැවිරිදි ඉන්දීය ජාතික රැඳවියෙකු ද සිටින බව ඉන්දීය ජනමාධ්ය වාර්තා කරයි.
‘උන්නික්රිෂ්ණන් එස්.’ (Unnikrishnan S.) නමැති මෙම රැඳවියා ගැටුමෙන් මියගොස් ඇති බව කොළඹ සිටින නිල ආරංචි මාර්ග තහවුරු කර ඇති අතර, ශ්රී ලංකාවේ ඉන්දීය මහකොමසාරිස් කාර්යාලය විසින් මේ සම්බන්ධයෙන් විදේශ කටයුතු අමාත්යාංශය වෙත රාජ්යතාන්ත්රික දැනුම්දීමක් සිදුකර තිබෙන බව The Hindu පුවත්පත වාර්තා කරයි.
මේ අතර, බරපතළ තුවාල ලබා ප්රතිකාර ලබමින් සිටි තවත් බන්ධනාගාර නිලධාරියෙකු ජීවිතක්ෂයට පත්වීමත් සමඟ මෙම ඛේදවාචකයෙන් මියගිය සමස්ත සංඛ්යාව 28 දක්වා ඉහළ ගොස් ඇත.
ඉන් 7 දෙනකු බන්ධනාගාර නිලධාරීන් වන අතර 21 දෙනෙකු රැඳවියන් වේ.
තවදුරටත් නිලධාරීන් සහ රැඳවියන් 100කට ආසන්න පිරිසක් රෝහල්ගතව ප්රතිකාර ලබති.
බන්ධනාගාරය තුළ ක්රියාත්මක වූ මත්ද්රව්ය ජාවාරමක් පිළිබඳව බලධාරීන්ට තොරතුරු ලබා දුන් රැඳවියන් පිරිසකට, ප්රතිවිරුද්ධ පාතාල කණ්ඩායමක් විසින් පහර දීමත් සමඟ මෙම ගැටුම ආරම්භ වී තිබේ.
පසුව රැඳවියන් බන්ධනාගාර අවි ගබඩාවෙන් ගිනිඅවි පැහැරගෙන ආරක්ෂක අංශ වෙත ද ප්රහාර එල්ල කර ඇත.
පවතින නොසන්සුන් සහ අවදානම් තත්ත්වය සැලකිල්ලට ගෙන, මීගමුව බන්ධනාගාරයේ රඳවා සිටි අනෙකුත් ඉන්දීය ජාතිකයන් ඇතුළු රැඳවියන් 1,200කට ආසන්න පිරිසක් ඔවුන්ගේ ආරක්ෂාව වෙනුවෙන් දිවයිනේ සෙසු බන්ධනාගාර වෙත කඩිනමින් මාරුකිරීමට බලධාරීන් පියවර ගෙන තිබේ.
සිද්ධිය සම්බන්ධයෙන් විශ්රාමික විනිසුරුවරයකුගේ ප්රධානත්වයෙන් යුත් විශේෂ කමිටුවක් මඟින් පුළුල් විමර්ශනයක් ආරම්භ කර ඇත.
