ඓතිහාසික ශ්රී දළදා මාලිගාවේ වාර්ෂික මෙහෙයුම් සහ නඩත්තු පිරිවැය රුපියල් බිලියන 1.5ක් දක්වා පෙර නොවූ විරූ ලෙස ඉහළ ගොස් ඇති බව දියවඩන නිලමේ ප්රදීප් නිලංග දෑල මහතා පවසයි.
පල්ලෙකැලේ ප්රදේශයේ පැවති උත්සවයක් අමතමින් දියවඩන නිලමේවරයා සඳහන් කළේ, මාලිගාවේ සාම්ප්රදායික වත්පිළිවෙත් අඛණ්ඩව පවත්වාගෙන යාමට සහ පූජා භූමියේ නඩත්තු කටයුතු වෙනුවෙන් දිනකට අවම වශයෙන් රුපියල් මිලියන 5ක මුදලක් උපයා ගත යුතු බවයි.
"මෙය වර්තමානය වන විට විශාල වගකීමක් මෙන්ම අභියෝගයක් වී තිබෙනවා. විශේෂයෙන්ම ආදායම සහ වියදම අතර පවතින පරතරය කළමනාකරණය කර ගැනීම මෙම වසරේ මුහුණ දෙන ප්රබල ගැටලුවක්," යැයි ද ඔහු එහිදී අවධාරණය කළේය.
පසුගිය දශක දෙකක කාලය තුළ දළදා මාලිගාවේ මූල්ය තත්ත්වයෙහි සිදුව ඇති දැවැන්ත වෙනස පිළිබඳව ද දියවඩන නිලමේවරයා කරුණු පැහැදිලි කළේය.
ඒ අනුව, 2005 වසරේදී දළදා මාලිගාවේ වාර්ෂික ආදායම රුපියල් මිලියන 80ක් පමණ වූ අතර, ඉන් මිලියන 35ක්ම උපයාගෙන තිබුණේ පොලී ආදායම් මාර්ගවලිනි.
එහෙත් වර්තමානය වන විට රුපියල් බිලියන 1.5ක වාර්ෂික පිරිවැයක් සපුරා ගැනීම අතිශය දුෂ්කර කාර්යයක් වී ඇති බව ඔහු පෙන්වා දුන්නේය.
ශ්රී දළදා මාලිගාවේ දෛනික තේවාවන් පැවැත්වීම, සියවස් ගණනක් පැරණි පෞරාණික ගොඩනැඟිලි සංරක්ෂණය කිරීම, කාර්ය මණ්ඩල වැටුප් ගෙවීම සහ මාලිගාවේ හස්ති පන්තිය නඩත්තු කිරීම ඇතුළු කටයුතු රැසක් සඳහා මෙම පිරිවැය වැය කෙරේ. සංචාරක කර්මාන්තය, බැතිමතුන්ගේ ආධාර සහ ස්ථාවර තැන්පත්වල පොලී ආදායම මාලිගාවේ ප්රධාන ආදායම් මාර්ග වේ.
නූතන ආර්ථික ඉල්ලුමට සරිලන පරිදි මාලිගාවේ කටයුතු පවත්වාගෙන යාම සඳහා ස්ථාවර ආදායම් මාර්ගවල අවශ්යතාව වඩ වඩාත් මතු වී ඇති බව ද දියවඩන නිලමේවරයා වැඩිදුරටත් සඳහන් කළේය.
