මධ්යම අප්රිකානු ජනරජයේ අතිශය අස්ථාවර සහ අනතුරුදායක යුද කලාපයක සිටි, තුවාල ලැබූ එක්සත් ජාතීන්ගේ නිලධාරීන් දෙදෙනකු මුදාගෙන ඔවුන්ගේ ජීවිත බේරාගැනීමේ (CASEVAC) විශේෂ මෙහෙයුමක් ක්රියාත්මක කිරීමට ශ්රී ලංකා ගුවන් හමුදා ඒකකය සමත්ව තිබේ.
සාමසාධක රාජකාරි කටයුතුවල නිරත ශ්රී ලංකා ගුවන් හමුදාව එම මෙහෙයුම සාර්ථකව සිදුකර තිබෙන අතර මධ්යම අප්රිකානු ජනරජයේ සෙමියෝ (Zemio) ප්රදේශයේ පැවැති සන්නද්ධ ගැටුම් අතරතුර එක්සත් ජාතීන්ගේ කාර්ය මණ්ඩලයේ දෙදෙනකු බරපතළ තුවාල ලබා ඇති බවට ලද හදිසි පණිවිඩයක් සමඟ මෙම මෙහෙයුම ආරම්භ කර තිබෙන බව ගුවන් හමුදා මාධ්ය අංශය පවසයි.
වහා ක්රියාත්මක වූ ශ්රී ලංකා ගුවන් හමුදා කණ්ඩායම Mi-17 (UNO 325P) වර්ගයේ හෙලිකොප්ටර් යානයක් ඒ සඳහා යොමුකර තිබෙන අතර විංග් කොමාන්ඩර් නෙල්සන් ද සිල්වා මහතාගේ නායකත්වයෙන් සහ ෆ්ලයිට් ලෙෆ්ටිනන්ට් අරුණෝද ඒකනායක මහතාගේ සහාය නියමුවරයා ලෙසින් ක්රියාත්මක වූ මෙම මෙහෙයුමට තවත් නිලධාරීන් සහ ගුවන් වෛද්ය කණ්ඩායමක් ඇතුළත්ව තිබේ.
මුදාගැනීමේ ස්ථානය සෙමියෝ මෙහෙයුම් මධ්යස්ථානයේ සිට කිලෝමීටර් 20ක් ඊසාන දෙසින් පිහිටා තිබූ අතර, එහි දී ශ්රී ලංකා ගුවන් හමුදාවට අභියෝග රැසකට මුහුණ දීමට සිදුව ඇත. ගෲප් කැප්ටන් සුජිත් පෙරේරා මහතා ඇතුළු ගුවන් වෛද්ය කණ්ඩායම යානය තුළදීම තුවාලකරුවන්ට අවශ්ය හදිසි ප්රතිකාර ලබා දී ඇති බව වාර්තා වෙයි.
පැයකුත් විනාඩි 45ක කාලයක් පුරා ක්රියාත්මක වූ මෙම මෙහෙයුම අවසානයේ, තුවාල ලැබූ නිලධාරීන් දෙදෙනා වැඩිදුර ප්රතිකාර සඳහා බංගුයි අගනුවර වෙත ආරක්ෂිතව රැගෙන ඒමට ද ශ්රී ලංකා ගුවන් හමුදාව සමත්ව තිබේ.
