හතරලියද්ද පොලිස් ස්ථානයේ හිටපු වැඩබලන ස්ථානාධිපතිවරයා 16 හැවිරිදි පිරිමි ළමයෙකුට නීතිවිරෝධී ලෙස අත්අඩංගුවට ගැනීම, වධහිංසා පැමිණවීම සහ නීතිවිරෝධී ලෙස රඳවා තබා ගැනීම මගින් ඔහුගේ මූලික අයිතිවාසිකම් උල්ලංඝනය කර ඇති බව ශ්‍රේෂ්ඨාධිකරණය විසින් තීරණය කර ඇත.
අධිකරණය විසින් කරන ලද නිරීක්ෂණ අනුව, වැඩබලන ස්ථානාධිපති, පොලිස් පරීක්ෂක වීරකෝන්, නීතියට අනුව නියමිත කාල සීමාව තුළ බාලවයස්කරු අධිකරණයට ඉදිරිපත් කිරීමට අපොහොසත් වී ඇති අතර, ප්‍රශ්න කිරීම් අතරතුර ඔහුට බරපතල ශාරීරික හා මානසික හිංසනයන් සිදු කර ඇති බවට තහවුරු විය.
එක් අවස්ථාවකදී, වැඩබලන ස්ථානාධිපතිවරයා රෙදි කැබැල්ලකට නයි මිරිස් කුඩුකර, එය වතුර සමඟ මිශ්‍රකර එම සාරය පිරිමි ළමයාගේ ඇස්වලට මිරිකා ඇති බවද හෙළි විය.
ස්වර්ණාභරණ සොරකමක් සම්බන්ධයෙන් සැකකරැ ලෙස අත්අඩංගුවට ගත් මෙම පිරිමි ළමයා, පසුව ගලගෙදර මහේස්ත්‍රාත් අධිකරණය විසින් විභාගයකින් පසු නිදොස් කොට නිදහස් කර තිබිණි. පිරිමි ළමයාගේ සාක්ෂි අනුව, 2022 අගෝස්තු 6 වැනි දින චෝදනා කරන ලද සොරකම පාපොච්චාරණය කිරීම ප්‍රතික්ෂේප කිරීමෙන් පසු ඔහුට පළමු වරට වධ හිංසා පමුණුවා ඇත. එහිදී, වැඩබලන ස්ථානාධිපතිවරයා තවත් නිලධාරියෙකු විසින් ඔහුව සීමා කර ඇති අතරතුර විශාල ලී පොල්ලකින් ඔහුගේ පාදවල යටි පතුල්වලට කිහිප වතාවක් පහර දී ඇත. බාලවයස්කරු නැවත නැවතත් තම නිර්දෝෂීභාවය ඉල්ලා සිටියද, වැඩබලන ස්ථානාධිපතිවරයා ඔහුට සමච්චල් කරමින් කියා ඇත්තේ, අල්ලා දෙවියන්ගෙන් ලැබෙන දඬුවමට වඩා ඔහුට දෙන දඬුවම දරුණු වනු ඇති බවයි.
අධිකරණ සභාපති ජනක ද සිල්වා, මෙනකා විජේසුන්දර සහ සම්පත් බී. අබයකෝන් යන විනිසුරුවරුන්ගෙන් සමන්විත ශ්‍රේෂ්ඨාධිකරණ ත්‍රිපුද්ගල විනිසුරු මඩුල්ල නිරීක්ෂණය කළේ, වෛද්‍ය සාක්ෂි මගින් මෙම දරුවාට එල්ල වූ වධහිංසා තහවුරු වී ඇති බවත්, රක්ෂිත බන්ධනාගාරයේ සිටියදී ඔහු නැවත නැවතත් අකටයුතුකම්වලට ලක්ව ඇති බවත්ය.
ඒ අනුව, අධිකරණය විසින් වැඩබලන ස්ථානාධිපතිවරයාට පෞද්ගලිකව පිරිමි ළමයාට රුපියල් 300,000 ක වන්දියක් ගෙවන ලෙසත්, දෙවැනි පෙත්සම්කාරිය ලෙස අධිකරණයට පෙත්සමක් ඉදිරිපත් කළ පිරිමි ළමයාගේ මවට අමතරව රුපියල් 75,000 ක් ගෙවන ලෙසත් නියෝග කළේය. තම පුතාව රඳවා තබා ගැනීම අතරතුර ඔහු හමුවීමට මවට නීත්‍යානුකූල බලාපොරොත්තුවක් ඇති බවත්, එම අයිතිය ප්‍රතික්ෂේප කිරීම නිසා ඇයට බරපතල මානසික පීඩාවක් ඇති වූ බවත් අධිකරණය පිළිගත්තේය.
අනාගතයේදී මෙවැනිම උල්ලංඝනයන් වැළැක්වීමේ අරමුණින්, ශ්‍රේෂ්ඨාධිකරණය විසින් පොලිස්පතිවරයාට වැදගත් නියෝගයක් නිකුත් කර ඇත. ඒ, බාලවයස්කරුවෙකු අත්අඩංගුවට ගත් විට, මහේස්ත්‍රාත්වරයෙකු හමුවට ඉදිරිපත් කිරීමට පෙර සහ ඕනෑම අවස්ථාවක අත්අඩංගුවට ගැනීමෙන් පැය හයක් ඇතුළත මව, පියා හෝ ඔවුන් නොමැති අවස්ථාවක සමීප ඥාතියෙකුට දරුවා හමුවීමට අවසර දිය යුතු බවට සියලුම පොලිස් නිලධාරීන්ට පැහැදිලි උපදෙස් දෙන ලෙසයි.
