පෞද්ගලික බස් රථ සේවයේ නියුතු සේවක සංඛ්‍යාව දිනපතාම පහළ යෑම නිසා සමස්ත කර්මාන්තයම බරපතළ අර්බුදයකට මුහුණ දී ඇතැයි පෞද්ගලික බස් රථ හිමියන්ගේ සංගමයේ සභාපති ගැමුණු විජේරත්න මහතා ප්‍රකාශ කරයි.
මාර්ගස්ථ මගී ප්‍රවාහන අධිකාරිය ඔක්තෝබර් 1 වන දා සිට සියලුම පෞද්ගලික බස් රථවල කොන්දොස්තරවරුන් අනිවාර්යයෙන්ම මගීන්ට ටිකට්පත් නිකුත් කළ යුතු බවත්, මගීන් ද අනිවාර්යයෙන්ම ඒවා ලබා ගත යුතු බවත් නිවේදනය කර තිබේ.
කෙසේ වෙතත්, මෙම නීතිය කඩ කරන මගියකු හෝ කොන්දොස්තරවරයකු අත්අඩංගුවට ගැනීමට හෝ දඬුවම් නියම කිරීමට පොලිසියට නීතියෙන් බලයක් නොමැති බව සභාපතිවරයා පෙන්වා දෙයි.
ඒ මහතා පවසන පරිදි, යම් පුද්ගලයකු අත්අඩංගුවට ගැනීමට හැකි වන්නේ මාර්ගස්ථ මගී ප්‍රවාහන අධිකාරියේ නියෝජිතයකු විසින් අදාළ සිද්ධිය පිළිබඳව සොයා බැලීමෙන් හා මැදිහත් වීමෙන් අනතුරුව පමණි.
