අගෝස්තු මාසය ජාතික මව්කිරි දීමේ මාසය ලෙස සෞඛ්‍ය හා ජනමාධ්‍ය අමාත්‍යාංශය විසින් ප්‍රකාශයට පත් කර තිබේ.
රටවල් 170කට අධික සංඛ්‍යාවක් අන්තර්ජාතික මව්කිරි දීමේ සතිය සමරනු ලබන අතර ඒ වෙනුවෙන් මෙරට පැවති උත්සවයේ දී මව්කිරි දීමේ මාසය ප්‍රකාශයට පත්කෙරිණි.
සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස විසින් ඊට අදාළ නිවේදනය නිකුත් කළේය.
මව්කිරි දීමේ වැදගත්කම, අතීත ක්‍රියාකාරකම් සමාලෝචනය කිරීම, මව්කිරි දීමේ මූලධර්ම දහය ප්‍රවර්ධනය කිරීමේදී කැපී පෙනෙන කාර්යයන් සඳහා සෞඛ්‍ය වෘත්තිකයන් ඇගයීම සහ තවත් අදාළ වැඩසටහන් මීට සමගාමීව පැවැත්විණි.
මව්කිරි දීම මවගේ සහ දරුවාගේ සෞඛ්‍යයට පමණක් නොව ඔවුන්ගේ චිත්තවේගීය බැඳීම ශක්තිමත් කරන බව අමාත්‍ය ජයතිස්ස පැවසීය.
මව්කිරි දීම අත්‍යවශ්‍ය පෝෂ්‍ය පදාර්ථ සහ ප්‍රතිදේහ සපයන බවත්, ළදරුවන්ගේ ප්‍රතිශක්තිය වැඩි කරන බවත්, විවිධ රෝග අවදානම අඩු කරන බවත් ඔහු සඳහන් කළේය.
මව්කිරි දීමේ පිළිවෙත්වල ඉහළ කාර්ය සාධනයක් සඳහා ශ්‍රී ලංකාව අන්තර්ජාතික වශයෙන් පිළිගැනීමට ලක්ව ඇති බව පෙන්වා දෙමින් අමාත්‍යවරයා සෞඛ්‍ය නිලධාරීන්ගේ දශක ගණනාවක කැපවීම අගය කළේය.
මව්කිරි දීම සෞඛ්‍ය සහ සමාජීය වටිනාකමක් ලෙස ප්‍රවර්ධනය කළ යුතු බවත්, ප්‍රජාව, මාධ්‍ය සහ අනෙකුත් පාර්ශවකරුවන්ගේ සම්බන්ධීකරණය අවශ්‍ය බවත් ඔහු අවධාරණය කළේය.
මාතෘ නිවාඩු හිමිකම් සහ මව්කිරි දීමේ නිර්දේශ අතර පරතරය ද අමාත්‍යවරයා පෙන්වා දුන් අතර, රට පුරා මව්කිරි දීම දිරිමත් කිරීම සඳහා සහායක වැඩසටහන්වලට ප්‍රමුඛත්වය දෙන ලෙස ඉල්ලා සිටියේය.
මෙම මුවැඩසටහන් සඳහා සෞඛ්‍ය අමාත්‍යාංශය අවශ්‍ය සහාය ලබා දෙන බවට ඔහු සහතික විය.
උපතින් පසු පළමු පැය තුළ මව්කිරි දීම ආරම්භ කිරීම, පළමු මාස හය තුළ මව්කිරි පමණක් දීම සහ වසර දෙකක් හෝ ඊට වැඩි කාලයක් වයසට ගැළපෙන අනුපූරක ආහාර සමඟ ඉදිරියටත් මව්කිරි දීම ජාතික මාර්ගෝපදේශය මගින් නිර්දේශ කරයි.
සෑම වසරකම අගෝස්තු 1-7 දක්වා සමරනු ලබන ලෝක මව්කිරි දීමේ සතිය, මව්කිරි දීමේ ප්‍රතිලාභ පිළිබඳ දැනුවත්භාවය ඉහළ නැංවීම සහ ගෝලීය වශයෙන් අදාළ පිළිවෙත් ශක්තිමත් කිරීම අරමුණු කරයි.
