නව වාහන ආනයනය කළද දැනට වෙළෙඳපොළේ පවතින භාවිත කරන ලද වාහනවල මිල ගණන් අඩුවීමක් සිදු නොවනු ඇතැයි වාහන ආනයනකරුවෝ පවසති.
ආනයනික වාහන සඳහා පනවා තිබෙන ඉහළ බදු හේතුවෙන් මෙරට වෙළෙඳපොළේ පවතින භාවිත කළ වාහන මිල ගණන් එතරම් වෙනසක් සිදු නොවනු ඇතැයි ද ඔව්හු කියා සිටිති.
ශ්‍රී ලංකා වාහන ආනයනකරුවන්ගේ සංගමයේ භාණ්ඩාගාරික එම්. කේ. දුෂාන් අසංග මහතා කියා සිටියේ ජපානයෙන් ආනයනය කරන ලද වාහන විශාල ප්‍රමාණයක් මේ මස අග මෙරටට ලැබීමට නියමිත බවය.
අලුතින් ආනයනය කරන ටොයෝටා ඇක්වා මෝටර් රථයක් රුපියල් එක් කෝටි තිස් ලක්ෂයක් පමණ වන බවද ඔහු පැවැසීය.
දැනට වෙළෙඳපොළේ භාවිත කරන ලද ඇක්වා මෝටර් රථයක් රුපියල් ලක්ෂ 70 ත් 80 ත් අතර මිලකට අලෙවි කෙරේ.
නව වැගන් ආර් මෝටර් රථයක් රුපියල් ලක්ෂ 90 ක් පමණ වන බව ද දුෂාන් අසංග පැවැසුවේය.
මේ අතර ජපානයෙන් ආනයනය කරන ලද වාහන 196 ක් හම්බන්තොට වරායට පසුගිය බ්‍රහස්පතින්දා (27) සවස ළඟා වී ඇති අතර එම වාහන මේ සතියේ සිට වෙළෙඳපොළට නිකුත් කිරීමට නියමිතය.
