පාසල් ආපනශාලා තුළ හොට් ඩෝග්, බර්ගර්, පීසා, බිස්කට්, කේක්, කාබනේටඩ් බීම (පැණිබීම), චිප්ස් වර්ග (extruded snacks) සහ ඇසුරුම් කළ බීම වර්ග ඇතුළු අධික සීනි, අධික මේදය සහිත සහ සැකසූ ආහාර ද්රව්ය අලෙවි කිරීම තහනම් කරමින් සෞඛ්ය අමාත්යාංශය විසින් නව චක්රලේඛයක් නිකුත් කර තිබේ.
සෞඛ්ය ප්රවර්ධන කාර්යාංශයේ පැවැති මාධ්ය හමුවකට එක්වෙමින් පෝෂණ අංශයේ විශේෂඥ වෛද්ය මොනිකා විජේරත්න ප්රකාශ කළේ, පාසල් ආපනශාලා නියාමනය සහ අධීක්ෂණය කිරීම සඳහා මාර්ගෝපදේශ සංග්රහයක් ද හඳුන්වා දී ඇති බවයි.
පාසල් දරුවන් අතර අධික බර සහ තරබාරුකම ඉහළ යෑමේ ප්රවණතාව සැලකිල්ලට ගනිමින් මෙම පියවර ගත් බව සෞඛ්ය බලධාරීහු පවසති. 2024 වසරේ පවත්වන ලද ගෝලීය පාසල් පාදක ශිෂ්ය සෞඛ්ය සමීක්ෂණයට අනුව, වයස අවුරුදු 13 ත් 17 ත් අතර පසුවන දරුවන්ගෙන් 12% ක් අධික බරින් යුක්ත වන අතර 3% ක් තරබාරුකමෙන් පෙළෙයි.
එම සමීක්ෂණයට අනුව, දරුවන්ගෙන් 17.4% ක් නිතිපතා කාබනේටඩ් බීම වර්ග පරිභෝජනය කරන අතර, 28.5% ක් අධික ලුණු සහිත ආහාර ද, 29% ක් අධික මේදය සහිත ආහාර ද, තවත් 41% ක් අධික සීනි සහිත ආහාර ද පරිභෝජනය කරන බව හෙළි වී තිබේ.
පාසල් දරුවන්ගේ සෞඛ්යය සහ පෝෂණ තත්ත්වය ඉහළ නැංවීම සඳහා පාසල් ආපනශාලා ඵලදායී ලෙස නියාමනය කිරීම සහ අධීක්ෂණය කිරීම අත්යවශ්ය වන බව නිලධාරීහු මෙහිදී අවධාරණය කළහ.
