මෙවර පන්දුවාර 20 ලෝක කුසලාන තරගාවලියේ සුපිරි 8 වටයට පිවිස සිටින ශ්රී ලංකා කණ්ඩායම, සෙසු ප්රතිවාදීන්ට දැවැන්ත අභියෝගයක් වනු ඇති බව ප්රවීණ ක්රිකට් විචාරක රවි ශාස්ත්රි පවසයි.
විශේෂයෙන්ම ශ්රී ලංකාවේ තණතීරු දඟපන්දු යවන්නන්ට හිතකර ලෙස සැකසී ඇති බැවින්, මවුබිමේදී ක්රීඩා කරන ශ්රී ලංකාව කිසිසේත්ම අවතක්සේරු නොකළ යුතු බව ඔහු අවධාරණය කරයි. දඟ කැවෙන සහ පන්දුව මන්දගාමීව පිත්තට එන තත්ත්වයන් යටතේ ශ්රී ලංකාව ලෝකයේ ඕනෑම ප්රබල කණ්ඩායමක් පරාජය කිරීමට සමත් බව ඔහුගේ මතයයි.
ඕස්ට්රේලියාවට එරෙහිව ශ්රී ලංකාව ලැබූ විශිෂ්ට ජයග්රහණය පිළිබඳව අදහස් දක්වමින් ශාස්ත්රි සඳහන් කළේ, එම තරගයේදී ශ්රී ලංකාව පන්දු යැවීම, පන්දු රැකීම සහ පිතිකරණය යන සෑම අංශයකින්ම "විශිෂ්ටත්වයටත් එහා ගිය" දක්ෂතාවයක් පෙන්නුම් කළ බවයි. ශ්රී ලංකාව සතු දක්ෂ දඟපන්දු බල ඇණිය මෙවැනි තණතීරුවලදී උපරිම ප්රයෝජන ගනු ඇති බවත්, එය සෙසු රටවලට දැඩි හිසරදයක් වනු ඇති බවත් ඔහු වැඩිදුරටත් කියා සිටියි.
ශ්රී ලංකා කණ්ඩායම මේ වන විට පෙන්නුම් කරන සමබරතාවය සහ ඔවුන්ට හිමි මවුබිමේ වාසිය නිසා මෙවර ලෝක කුසලාන අවසන් පූර්ව වටය සඳහා සුදුසුකම් ලැබීමට ඔවුන්ට ඉහළ අවස්ථාවක් පවතින බව ක්රිකට් විචාරකයන්ගේ පොදු මතය වී තිබේ. රවි ශාස්ත්රි පෙන්වා දෙන්නේ පීඩනය හමුවේ නොසැලී ක්රීඩා කළහොත් ශ්රී ලංකාව මෙවර ශූරතාවය දිනා ගැනීමට පවා ඉඩ ඇති බවයි.
